Enter Your Key Word

දරුවාගේ මානසික සංවර්ධනය කෙරෙහි ඔබෙන් ඉටු විය යුතු යුතුකම් මොනවාද?

දරුවන්ට මනා පෝෂණයක් ලබා දිය යුතු යැයි සිතන බහුතරයක් දෙමව්පියන් මුලිකත්වය ලබා දෙන්නේ ශාරීරික පෝෂණය පිළිබදව පමණි. ගුණයෙන් ඉහළ පෝෂණීය ආහාර ලබා දෙන්නට ඔවුන් පැකිළෙන්නේ නැත. නමුත් නිරෝගී දරුවෙක් ලෙස ඔබේ දරුවා හඳුන්වන්නට නම් දරුවා ශාරීරිකව මෙන්ම මානසිකවද උසස් පෝෂණයකින් හෙබි විය යුතුය. දරුවෙකුගේ මානසික පෝෂණය සම්බන්ධව මව්පියන් දැනුවත් විය යුත් වැදගත් කරුණු කිහිපයක් මේ ලිපිය පුරා විස්තර කෙරේ.

අන්තර් ක්‍රියාකාරීත්වය

වැඩි පෝෂණීය ආහාර වේලකට හෝ විධිමත් අධ්‍යාපනයකට වඩා ඔබ ඔබේ දරුවා වෙත දක්වන අර්ථාන්විත අන්තර් ක්‍රියාකාරිත්වය දරුවාගේ සුවපත් මානසික වර්ධනයට ආධාරක වේ. ඔබ දරුවා සමග රැඳී සිටින විට ඔබේ දුරකථනයෙන්, වැඩ වලින් සහ අනෙකුත් ගැටලු වලින් මිදෙන්න. ඔබ මෙය දවස පුරාම කළ යුතු නොවේ. අඛණ්ඩ අවධානය යොමු කළ පැය කිහිපයක් ඒ සඳහා ප්‍රමාණවත් වේ. දරුවාගේ හැඟීම්, ආකල්ප, ආශාවන්, නිරාශාවන් මෙන්ම දරුවා සතුට සහ බිය දනවන දේ හඳුනා ගන්න. මෙම අවධානය ඔබේ දරුවාගේ ජීවිතය ඔප දැමීම සඳහා බව අමතක නොකරන්න. එබැවින් ඔවුන්ට තත්ත්වයෙන් බාල බොලඳ ගීත ගැයීමට හෝ එවැනි ගීතයන්ට නර්තනයේ යෙදෙන්නට බලපෑම් කිරීමෙන් වළකින්න.

ඔවුන්ට රිසි දෙයක් කරන්නට ඉඩ හැර ඒ පිළිබඳව විමසිලිමත්ව සිටින්න. එවිට දරුවා ඔබ සමග යළි යළිත් රැදෙන්නට රිසි වනු ඇත. දරුවා සමග යම් ක්‍රීඩාවක නියැලීම ද ඵලදායී වනු ඇත. එසේ මොන යම් දේ සිදු කළත් එය දවසේ විඩාබර කාර්යයක් සේ නොසිතා එය දරුවා සමග රස විඳින්න. මේ අවස්ථාව දරුවාගේ සැඟවුණු ලෝකයට ඇතුළුවන්නට රුවන් දොරටුවක් සේ සිතා ඒ සැම මොහොතකම ඔබ ද සතුටුවන්න.

කොන්දේසි වලින් තොර ධනාත්මක අවධානය

ඔබේ දරුවා නිරන්තරයෙන් නිවැරදි කළ යුතු හෝ විනයාත්මක කළ යුතු අයෙක් සේ නොසිතන්න. පරිපූර්ණ දරුවෙක් තනන්නට කියා වෙහෙස නොවෙන්න. එම තීරණාත්මක ප්‍රවේශය, ඉවෙන් දකින දරුවාගේ ආත්මාභිමානය හීන කරන අතර එතැන් සිට දරුවා ඔබ සතුටු කරවන්නට වෙහෙසෙනු ඇත. එය ඔහුගේ වැඩෙන ප්‍රතිරූපයට හානිකර වනු ඇත. ඔහු තුළ තිබිය යුතු යැයි ලෝකයා සිතන බාහිර ප්‍රමිතීන් ගැන කනස්සලු නොවෙන්න. කුමන අන්දමේ දුර්වලතා තිබුණත් මුළු හදවතින්ම දරුවාට ආදරය කරමින් දරුවා විශිෂ්ටයෙකු සේ සළකන්න. යම් පිළිගත් අච්චුවකට දරුවා සකසන්නට උත්සාහ නොකරන්න. එවිට දරුවා ඔබව විශ්වාසනීය මෙන්ම ඔහුව තේරුම් ගත් අයෙක් සේ දකිනු ඇත. එවිට වැඩෙන දරුවා ඔහුගේ සිතුවිලි සියල්ල ඔබ හමුවේ විවර කරනු ඇත. එවිට ඔබ දරුවාගේ මාර්ගෝපදේශකයා බවට පත් වනු ඇත. මවක් පියෙක් ලෙස ඔබ ලබන ඒ ප්‍රමෝදජනක අත්දැකීමට වඩා ඔබට වෙන කිසිවක් වටී ද?

දරුවා නිවැරදි කරන්න, උදව් කරන්න, නිරන්තරයෙන් වෙහෙස නොකරන්න 

වැරදීම් සිදුවීමත් එය හඳුනා ගැනීමත් ඒ තුළින් නිවැරදි වීමත් දරුවාගේ සුවපත් වැඩිමට බොහෝ සේ ඵලදායී වනු ඇත. බොහෝ දෙමව්පියන් දරුවා අතින් සිදුවන වැරදීම් සෑම අංශුවක්ම නිවැරදි කරමින් වැරදීම් රහිත දරුවෙකු තනන්නට වෙහෙසෙයි. මෙය කිහිප ආකාරයකින්ම දරුවාට හානිකර වෙයි. මේ හේතුවෙන් ස්වයං ඥානය අඩාල වන අතර නියැළි කාර්යයේ තම නායකත්වය බිඳී උද්යෝගයද බිඳී යනු ඇත. දරුවා යෙදී සිටින කාර්යය සම්බන්ධ වැරදීම් සහ සෘණාත්මක අත්දැකීම් විසින් ඔහු පහසුවෙන් නිදොස් සහ පරිපූර්ණ තත්වයට පත් කරනු ලබයි. පියවරක් පස්සට ගන්න. ඇහැ ගහගෙන නමුත් නුදුටුවා සේ ඉන්න. වැටි වැටී නැගිටින්න ඉඩ හරින්න. එවිට අපූරුවට දරුවා වැඩෙයි.

පොළඹවන්න බිය වද්දන්න නම් එපා

බොහෝ දෙමව්පියන් තම දරුවාගේ හැසිරීම් රටා පාලනයට ''බියවැද්දීම'' අවියක් සේ යොදාගනු ඇත. ‘ඔයා නොකෑවොත් කෙට්ටු වෙයි’, ‘පලතුරු කෑවේ නැත්තන් ඔයා අසනීප වෙයි’,  ‘හරියට ඉගෙන ගත්තේ නැත්තන් ඔයාට හොඳ රස්සාවක් නැති වෙයි’, යනාදිය පවසමින් දරුවා බිය වද්දයි. දරුවා එසේ බිය වැද්දූ විට දරුවාට යම් ජයග්‍රාහී ඉලක්කයක් වෙත යාමේ අභිප්‍රායට හානි වනු ඇත. එවිට බියපත් දරුවා වැඩුණු පසුවද තමා නියැළි කාර්යය දොස් සහ විවේචන නොඅසන්නට පමණක් සිදු කරනු ඇත. මේ නිසා දරුවාගේ ස්වභිමානය සහ සඵලත්වය බිඳ වැටෙන අතර නව නිපැයුම් කිසිවකට දරුවා යොමු නොවනු ඇත. බිය වැද්දීම එම මොහොතේ ඵලදායී වුවද පසු කාලීනව දරුවාට හානි කර වනු ඇත. එබැවින් හැමවිටම ධනාත්මක පෙළඹවීම් පමණක් අනුගමනය කරන්න.

දරුවාට සවන් දෙන්න

දරුවන් යමක් පවසන විට ඇහුම්කන් දෙන්න. අවධානාත්මක සිතින් ඇහුම්කන් දීම කවුරුත් වර්ධනය කරගත යුතු නිපුණත්වයකි. දරුවා නිවැරදි කරන්න, අලුත් වචන උගන්වන්න නිරන්තරයෙන්ම වෙහෙසෙන්න එපා. දරුවාගේ යමක් නිවැරදි කරන විට ඉතා නම්‍යශීලී වන්න. දරුවා වෙත දෑස හොඳින් යොමු කරන්න. දරුවා වෙත භාවිතා කළ යුතු සැහැල්ලු විලාසය සහ අදාළ සංවේදී ප්‍රතිචාර ඔබේ සන්නිවේදන ක්‍රම විය යුතුය.

හඬන දරුවාට ඥානාන්විතව ප්‍රතිචාර දක්වන්න, වහාම නිහඬ කරවන්න උත්සාහ නොකරන්න

දරුවා තම සන්නිවේදනයට හැඩීම යොදා ගන්නවා. ඒ නිසා ඊට නිසි ලෙස ප්‍රතිචාර දැක්වීමට දෙමව්පියන් දත යුතුය. බොහෝ දෙමව්පියන් දරුවාගේ හැඩීම නවතාලන්නට වෙහෙසෙනවා මිස හැඩීමට හේතු නොසොයයි. හැඞීම දුර්වලතාවක් ලෙස දරුවාට ඒත්තු ගැන්වීමට පෙලඹෙයි. එවිට දරුවා තුළ ජනිත වන්නේ ඍණ මානසික තත්වයකි. සෙමෙන් දරුවාගේ හැඞීමට හේතු නිරීක්ෂණය කරන්න. කලබල නොවී සන්සුන්ව ඒ හේතු කාරණා වලට ආදරණීය පිළියම් පෙන්වා දෙන්න.

දරුවා වෙත ඉවසීමෙන් යොමු වන්න

දවස පුරා කාලයත් සමග පොරබදන ඔබට මවු පිය කටයුතු හා වගකීම් අභියෝගයක් වෙන්න පුළුවන්. ඉක්මනට දත් මදින්න, ලහි ලහියේ සපත්තු පැළඳ ගන්න, නිවෙන්න පෙර කෑම කන්න කියා ඔබ විධාන කරනවා වෙන්න පුළුවන්. එහෙත් දරුවන්ට කාලය පිළිබඳ වැඩි දැනීමක් නැහැ. නිපුණත්වය පිළිබඳ ඔබේ නිර්ණායකයන් එයාලගේ ලෝකයට අදාළ නැහැ. යම් කාල සීමාවකට අනුගත කරවා දරුවා පීඩනයකට පත් කරන විට දරුවා සමග වැදගත් අන්තර් ක්‍රියාකාරිත්වයකට ඇති ස්වර්ණමය ඉඩකඩ ද ඔබට අහිමි විය හැකියි. ඔබේ කාලසටහන වෙනස් කරගන්න උත්සාහ ගන්න. එවිට ඔබට විවේකීව දරුවා සමග එක්ව කටයුතු කළ හැක. එවිට හෙමිහිට නිපුණ දරුවෙකු තනා ගන්නට ද හැකිය.

හැමවිටම දරුවාගේ අත්පොළසන් නගන්නා නොවෙන්න

දරුවා අගය කරමින් ජීවිතයේ උසස් ඉලක්ක ජය ගන්නට දිරිය දෙන්න. නමුත් නිරන්තර අත්පොළසන් නගන්නා වෙමින් දරුවාගේ සෑම දිනුමක්ම අධික ඇගයීමකට ලක් කිරීම ඔබේ වගකීම යැයි සිතන්න එපා. දෙමව්පියන් බොහෝ විට තම දරුවා නිතර වර්ණනා කරමින්, විශිෂ්ඨ බව, ඉතා ලස්සන බව මෙන්ම නිපුණ බව නිරන්තරයෙන් පවසනු ලැබේ. ඔවුන් සිතන්නේ ඒ හේතුවෙන් දරුවන් විවේචනය කරනවාට වඩා, දරුවාගේ ස්වාත්මාභිමානය වඩවා තවත් ජයග්‍රහණයන්ට දරුවා පොළඹවනු ඇති බවයි. එහෙත් මනෝවිද්‍යාත්මකව, මෙම ප්‍රතිපත්තිය තුළින් දරුවාට වෙනත් අන්දමේ හානිකර තත්වයන් ද මතුවිය හැකි බව වටහා ගන්න. එසේ නිරන්තරයෙන් වර්ණනා කිරීමෙන් ඊලඟ ඉදිරි අවස්ථාවේදී තමා දෙවැනි වේදෝයි පීඩනයක්, බියක් දරුවාට ජනිත විය හැක. ඔබත් දරුවාත් අතර බැඳීමට අවහිර විය හැක. මේ නිසා වැඩුණ දරුවාට බාහිර උත්තේජකයන් අවශ්‍ය වෙනු ඇත. ඒ නිසා දරුවා දිරිමත් කරන්න. නමුත් පමණ ඉක්මවා වර්ණනා නොකරන්න.

තිරසාර බව

දරුවා සමග හැසිරෙන්නේ කෙසේදැයි පවුලේ සියල්ල ඒකමතිකව තීරණයක සිටිය යුතු වෙයි. දරුවාගේ මානසික ස්ථාවරත්වයට එය සම්මාදන් වනු ඇත. නැතිනම් දරුවාට ඔබේ ආකල්පමය ඉරියව් හඳුනා ගැනීමට අපහසු වනු ඇත. එනම් දරුවාට ඔබව තේරුම් ගැනීමට අපහසු වනු ඇත. එවිට දරුවා දරුවාට අවශ්‍ය දේ ලබා ගැනීමට ඇති සීමා පවුරු බිඳ දමන්නට උත්සාහ කරනු ඇත. ඔබ එක් පිළිවෙතක පවතින්නේ නම් එයින් දරුවාට ඔබ ගැන නිත්‍ය තක්සේරුවක් තනාගත හැකි වන අතර දරුවාගේ විනයාත්මක පැවැත්මට එය ඵලදායී වනු ඇත.

එබැවින්, අවබෝධයෙන් යුතුව ඔවුන් පිළිගනිමින්, ඔවුන්ට ප්‍රතිචාර දක්වමින්, අනුගත වීමෙන්, දරුවන්ගේ වර්ධනය කෙරෙහි වැදගත් බලපෑමක් ඇති කළ හැක. නමුත් පමණ ඉක්මවා ඔවුන් නිවැරදි කරන්නට වෙර දැරීමත් පමණ ඉක්මවා ඔවුන් වර්ණනා කිරීමත් යන අන්ත දෙකම දරුවන්ගේ යහපත් මානසික වර්ධනයට බාධාවකි. දෙමව්පියන් ලෙස ඔබ සැමවිටම ඔබේ දරුවාගේ හැසිරීම නිරීක්ෂණය කළ යුතු අතරම ඒ පිළිබඳව මනා අවධානයකින් පසු විය යුතුය. දරුවාගේ හැසිරීමේ යම් අර්බුදකාරී තත්වයක් පෙන්නුම් කරයි නම් ඒ සඳහා අවැසි පියවර වෙත කඩිනමින් යොමු වීම ඔබේ වගකීම බව සිහි තබා ගත යුතුය. ඔබ කොයි තරම් කැපවීමෙන් සහ උනන්දුවෙන් දරුවාගේ මානසික සෞඛ්‍යය ගොඩ නැංවීම කෙරෙහි ඇප කැප වුවද එහි යම් අඩුවක් හෝ වෙනසක් පෙන්නුම් කරයි යන සුළු හෝ සැකයක් ඔබට මතු වේ නම් මේ හා සම්බන්ධ වෘත්තීයමය සුදුසුකම් සපිරි පුද්ගලයෙකු හමු වී අවශ්‍ය උපදෙස් ලබා ගනිමින් ගැටලුව නිරාකරණය කර ගැනීම නුවණට හුරුය. ඒ සඳහා ඔබට සේවය සැපයීම වෙනුවෙන් රජයේ සෑම ප්‍රධාන රෝහලකම පාහේ මානසික සෞඛ්‍යය සායන ක්‍රියාත්මකයි. එවැනි සායනයකට යොමු වී ඔබේ ගැටලුව නිරාකරණය කර ගැනීමට පසුබට නොවන්න.

Your Name

Email

Comment

0 Comments